Su Casteddu bincit una de is partidas prus importantis de s’annu contra sa Cremonese, rivali direta po unu postu in sa pròsima Serie A. Esposito segnat ancora ma custa borta su gol es grai e portat in domu tres puntus ca ballint dopiu. Su Casteddu atziat a 33 puntus, sa Cremonese abarrat a 27.
Sa partida. Po cussa chi est diadeurus una sfida direta po abarrai in sa Serie A no ci funt contus de fai, serbit isceti binci.
Su Casteddu partit beni, pressat de sa fàscia dereta cun Palestra e Borrelli ma sa Cremonese no abarrat a castiai e a su minutu 11 tenit un’ocasioni manna, Okereke solu ananti a Caprile arruit provendi a ddu dribblai.
Passant dexi minut e sa Cremonese est un atra borta acanta de segnai sempri cun Okereke, custa borta de conca.
Su Casteddu no tenit conca, sufrit e candu tenit is ocasionis no ddas sfrutat. A su 37′ e a su 39′ Folorunsho e Gaetano ci provant una pariga de bortas de aiuntru s’area ma sa difesa de sa Cremonese si serrat sempri beni.
A su 55′ atra ocasioni po sa Cremonese. Bonazzoli driblat Rodruguez in area ma su tiru bessit de unu nudda.
Su Casteddu si ndi scidat. A su 59′ ci provat cun Mina de conca e a su 63′ arribat su gol. Ze Pedro de sa dereta pinzellat unu cross a su secundu palu, Esposito de conca dda piatzàt in diagonali e fadit gol, 1-0.
Passant dexi minutus e Deiola de conca po pagu no fait su secundu, bella parada de su portieri Audero.
In su finali si torrat a biri puru su “caboni” Belotti, atacanti ca podit essi meda de agiudu in s’ultimas partidas.
Su Casteddu apoderat fitzas a sa fini e aguantat tres puntus de importu mannu, lompit a 33 e sa Cremonese abarrat a 27 puntus. Sa cunfirma in Serie A imoi est acanta.
Mister Giampaolo: «Nosu beni fintzas a su gol, in su finali seus mancaus»
Presidenti Giulini: «Seu prexiau, funt bessius is valoris de custa genti. Binci oi est de importu mannu ma depeus giogai fintzas a sa fini cumenti ogna annu. Seus criendi unu progretu de importu, funt piciocus. Mendy, Rodriguez, Obert e claramenti Palestra. No est facili sa Serie A, non est facili serrai su bilanciu, aciapai investidoris. No est facili fai unu stadiu, seu dexi annus ca nci provaus. Funt tempus stranus in su mundu, sa mitadi de su faturau miu passat de Hormuz. Su progetu est bonu, cun Lecce e Pisa est andada mali, ma Pisacane at sbagliau dus partidas. Felici e Idrissi fortzis mancant, su propriu Luvumbo poita no potaus nisciunus ca saltat s’aversariu. Immoi teneus sceti Balestra. No est crisi, seus in unu tempu de dificultadi. Depeus gherrai fintzas a sa fini, 33 puntus no funt suficientis po siguru. Sa strada est ancora longa. Sa contestatzioni a sa fini de su primu tempu po mei non est giusta, is tifosus funt importantis meda. Diaderus, funt importantis. Seus traballandi in manera seria, in custus tempus seus fadendi unu stadiu in una isola, no est facili po nudda. Podit essi unu volanu po s’economia».
Mister Pisacane: «Tres puntus, seus prexiaus. Borrelli, Deiola, Mazzitelli funt torraus a pustis de meda, non tenint ancora ritmu ma a sa fini eus bintu. Ze Pedro est importanti e ddu sciemu ca a unu certu puntu podiat donai unu contributu mannu. Deu sciu beni cantu traballu seus fadendi. Esposito? Seu prexiau meda po issu, tenit cualidadi manna, fortzis est unu de cussus ca ndi portat de prus, perou est unu picioccu, sbagliat, ma est fadendi meda. Sa contestatzioni a sa fini de su primu tempu? Deu pensu a su finali de sa partida, s’unicu ca contat. Sa mentalidadi est unu aspetu de importu. Belotti? Deus perdius subitu, moi est torrau e s’ada agiudai in su benidori».
Baschirotto: «Pecau, c’est mancau sceti su gol. Eus giogau beni ma no eus bintu. Gratzias a is tifosus, fiant meda e c’ant agiudau. Pecau. Po sa salveza? Deu ci creu, sa scuadra est bona e ci dda podeus fai. Oi eus meritau ma no eus bintu, mancai contra su Torino eus a fai mellus».
Zé Pedro: «Tres puntus ca pesant, ma no est spaciau innoi. Oi femu cuncentrau, seu intrau beni in sa gara e ci deus fata. Oi is tres puntus prus importantis? No creu, depeus sighiri a traballai»
Tabellino
Cagliari: Caprile: Palestra, Rodriguez (88′ Dossena), Mina, Obert; Deiola, Gaetano, Mazzitelli (30′ Adopo); Folorunsho (61′ Zé Pedro), Esposito (88′ Belotti); Borrelli (61′ Mendy). All. Fabio Pisacane.
Cremonese: Audero; Terracciano, Baschirotto, Luperto, Pezzella; Floriani Mussolini (68′ Sanabria), Grassi, Bondo (77′ Zerbin), Vandeputte (68′ Payero); Okereke (77′ Djuric), Bonazzoli. All. Marco Giampaolo.
Arbìtrus: Daniele Doveri de Roma 1, asistentis Filppo Bercigli di Firenze e Federico Fontani de Siena. Quartu uficiali Livio Marinelli de Tivoli. A su Var Marco Guida de Torre Annunziata e Paolo Mazzoleni de Bergamo.
Amonius: 4′ Terracciano (CR), 62′ Adopo (CA)
Marcadori: 63′ Esposito (CA)
