S’Inter sighit sa cursa a su scudetu e bincit po 3-0 contra a unu Casteddu ca at giogau beni sceti su primu tempu. Thuram, Barella e Zieliski is marcadoris.
Sa partida. Su Casteddu no partit mali, a su contrariu fintzas a su primu quartu de ora giocat forsis mellus. Esposito ci provat a su 3′, Palestra puru a su 12′ tenit una bella ocasioni, tiru altu.
S’Inter passu passu atziat su rìtimu e arribat in s’area de su Casteddu cun regularitadi ma Caprile, Mina e pruschetotu Adopo a su 16′ serrant beni sa porta.
Sa pressioni interista perou portat atru, prima Esposito e a pustis Borrelli si pigant su cartellinu grogu.
A su 40′ bella ocasioni po Pio Esposito, Caprile est beni piatzau e dda parat.
In su secundu tempu si biri sceti s’Inter. A su 53′ Di Marco de sa parti manca ponit in area unu cross de oru, Rodriguez no nci arribat e Thuram asolu depit sceti ponni in porta, 1-0.
Passant dus minutus e Barella arribat po primu in una mìschia in area e lestru scudit sa bòcia in porta, Caprile castiat sceti, 2-0.
Su Casteddu perdit sa motivatzioni, in campu si biri sceti s’Inter.
In su finali arribat puru su 3-0 con Zieliski ca de tesu ponit sa bòcia in su seti.
Pisacane: «Pecau, femus gioghendi beni fintzas a su gol. Pigai su secundu a pustis de dus minutus no s’at agiudau. Oi no fiat facili, custa est sa scuadra prus forti»
Tabellinu
Inter: Martinez; Akanji, de Vrij, Carlos Augusto; Dumfries, Barella (89′ Diouf), Calhanoglu (85′ Frattesi), Mkhitaryan (76′ Zielinski), Dimarco (76′ Luis Henrique); Pio Esposito, Thuram (76′ Bonny). All. Chivu
Casteddu: Caprile; Zé Pedro (88′ Belotti), Mina, Rodriguez; Palestra, Adopo, Gaetano (57′ Deiola), Sulemana (76′ Folorunsho), Obert (76′ Zappa); Esposito, Borrelli (57′ Mendy). All. Pisacane
