Su Bologna circat de fai sa partida, su Casteddu apoderat e criat sa mellus ocasionis ma a sa fini acabat 0-0, unu puntu po parti e conca a sa s’Udinese.
Sa partida. Su Casteddu oi partit beni e apustis de tres minutus segnada puru ma Deiola fiat in fuorigioco.
A su de 16′ grandu ocasioni sempri po so Casteddu, Esposito fintat su tiru de tesu e servit Deiola ca provat a dda piatzai acanta de su palu ma sa bocia besit de unu nudha.
Sa partida si fait tàtica e su Bologna, prus tècnicu, pigat campu. In su finali de tempu perou si torrat a biri su Casteddu cun Esposito serviu. Puru su Bologna criat una bella ocasioni, de sa parti manca Dominguez intrat in area cun sa bòcia, Mina ddu tocat e issu arruit, s’arbitru lassat curri.
In su secundu tempu partida sempri tàtica ma su Bologna tenit s’initziativa. A su de 55′ ci provat Moro de tesu, bellu su tiru e bella sa parada de Caprile. A su de 67′ nci provat Castro de sa parti manca, Caprile est atèntu e parat.
A su de 80′ sa mellu ocasioni de sa partita dda tenit Ze Pedro, ca apustis de una mìschia s’acatat asolu anati a sa porta e tirat artu. Pecau diaderus, fiat prus difìcili a dda sbagliai.
Su Casteddu ci creit e a su de 85′ Mendy intrat in s’area cun sa bòcia, Lucumi ddu spingit ma s’arbitru lassat curri.
Su Bologna provat a atziai sa presioni in su finali ma su Casteddu apoderat e torrat in Sardigna cun unu puntu pretziau.
