Su Casteddu est acanta de sa certesa matemàtica de abarrai in sa serie A, serbit sceti unu puntu, ma no est custa sa die. A unu primu tempu giocau beni meda est sighiu unu secundu no a s’artesa, cun s’Udinese chi at fatu sa partida e pigau is tres puntus.
Sa partida. Su Casteddu partit mellus e si fait a biri subitu cun Palestra e pruschetotu a se de 22′ cun unu bellu tiru de tesu de Esposito ca acabbat a foras de nudha.
A su de 30′ Casteddu torra acanta de su vantagiu, Ehizibue po anticipai Folorunsho po pagu no fait autogol.
Unu minutu apustis grandu riflessu de Okoye ca deviat su tiru de Gaetano de duus metrus. In su corner ca sighit mischia in area, Karlstrom dda pigat cun sa manu ma s’arbitru narat ca fiat unu movimentu naturali e no donat su rigori.
A su de 37′ si fait a biri s’Udinese cun unu bellu tiru de tesu de Pietroski, Caprile est beni piatzau e ddu parat.
In su finali de tempu torra Gaetano, serviu de Esposito a mesu area, nci provat cun unu piatzau ma sa difesa ddu blocat.
Su secundu tempu parit partiri beni, Adopo dda ponit in mesu po Esposito chi de duus metrus dda piatzat, Mlacic bogat sa bòcia de sa linea.
S’Udinese si ndi scidat e nci provat prima cun Zaniolo de tesu, bòcia in su palu, e a su de 56′ ci dda fait: Kamara imbucat de sa parti manca e dda ghetat in mesu, Buska arribbat e dda scudit aintru, 0-1.
Po binti minutus s’Udinese fait sa partida, su Casteddu si biri sceti a su de 76′ cun unu cropu de conca de Dossena e a su de 79′ cun Mendy.
Su Casteddu non parit cunvintu e a su de 85′ est s’Udinese a tenniri sa mellu ocasioni cun Davis ca asolu ananti a Caprile si fait parai su tiru.
A su de 92′ Davis frimat s’arbitru e ndi narat ca Dossena at nau cosas legias a sfundu raziali.
Parit spaciada aici ma a su de 96′ arribat su secundu gol de s’Udinese cun Gueye, ca serbiu in area propriu de Davis no sbagliat.
A perdi in custa manera no est bellu, sa cunfirma in serie A est acanta ma no est ancora sigura e duncas tocat a ponni atra conca in sa prossima sfida sempri in Casteddu contra su Torino.
Casteddu: Caprile; Zé Pedro (62′ I. Sulemana), Juan Rodriguez, Dossena; Palestra (62′ Zappa), Adopo (89′ Belotti), Gaetano, Folorunsho (73′ Albarracin), Obert (89′ Trepy); Se. Esposito, P. Mendy. All.: Pisacane
Udinese: Okoye; Mlacic (55′ Bertola), Kristensen, Solet; Ehizibue (79′ Arizala), Piotrowski (55′ Miller), Karlstrom, Atta, Kamara; Zaniolo (79′ Gueye), Buksa (65′ Buksa). All.: Runjaic.
Àrbitru: Federico Dionisi de s’Aquila
Gol: 56′ Buksa (U), 90’+6 Gueye (U).
Assist: Kamara (U, 0-1), Davis (U, 0-2).
Recuperus: 3+8.
Ammonius: Ehizibue, Zé Pedro.
