Una die ispeciali in Casteddu. Su capitanu de sa scuadra Leonardo Pavoletti salutat sa genti sarda apustis de 9 annus, 231 partidas e 52 gol. Una bella persona prima ca unu giocatori de importu.
In campu su Casteddu si giocat sa possibilitadi de abarrai in sa Serie A, serbit unu puntu sceti po sa sicuresa. Sa partida no est facili ma su coru oi no mancat e a sa fini si festat, 2-1.
Sa partida. In atacu Pisacane torrat a ponni Mendy de su primu minutu, in pari cun Esposito.
Su Casteddu partit mellus, giocat artu e a su de 8′ criat sa prima ocasioni cun Palestra, sa difesa si serrat. Su Casteddu abarrat ananti, pressat ma mancat sempri sa precisioni a s’urtimu.
Sa partida si fait passu passu prus tàtica, su Torino atziat su ritmu e cumintzat a si fai a biri ananti ma issus puru sbagliant meda a s’urtimu, cumenti a sa mes’ora candu Simeone no acatat sa porta da duus metrus.
A su de 38′ perou Obrador no sbagliat e cun unu tiru de 25 metrus dda ponit a suta de sa traversa, 0-1.
Ma su Casteddu no abarrat a castiai, passat unu minutu e Esposito serbiu de Gaetano in sa làcana de s’area pabasa a sa porta si girat e dda scudit a filu de su palu, 1-1.
Ma no est totu. A su de 48′ Zappa serbiu in area de sa parti manca nci provat, Paleari dda pigat ma no aguantat e Mina dda scudit aintru de conca, 2-1.
In su secundu tempu su ritmu si atziat, si curri de prus de una parti e de s’atra ma su Casteddu parit prus ativu.
A su de 74′ perou Zappa est acanta de fai unu arru mannu, pigat mali unu cross in s’area e in pratica fait unu assist perfetu po Adams ca asolu ananti a Caprile dda scudit beni puru acanta de su palu ma su portieri casteddaju salvat su risultau cun una parada strepitosa.
Su Torino olit su paregiu e atziat sa presioni, nci provat fintzas a sa fini ma su Casteddu apoderat e si pigat is tres puntus. Oi si festat diaderus.
Deiola: «Pavoletti s’at agiudau meda, oi eus bintu po issu puru. Immoi ca seu deu su capitanu, depu circai de pigai ispiratzioni de cussus ca ci fiant prima de mei.
S’annu chi benit depeus circai de fai mellus puru. Est stetiu unu campionau positivu meda, fortzis su prus positivu de candu ci seu. Pisacane est maniacali, creu ca at torrau beni toda sa fidi ca ant postu in custu progetu»
Pavoletti: «Una grandu die, lassu cun una bella festa. Su benidori? Moi bieus, ci funt dirigentis nous e tocada a biri ita olint fai. A mei at a fai praxeri abarrai in sa scuadra cumenti dirigenti, bieus»
Pisacane: «Ddu sciemu, d’apu sempri pensau e ndi femmu siguru. Creu fermamenti in custu progetu, sa scuadra est matura e motivada. Custa est puru sa prima borta ca binceus in domu e a foras. Pavoletti? No seu deu a nai chi podit abarrai cumenti dirigenti, de siguru tenit totas is calidadis. Gratzias a su Presidenti Giulini».
Marcatoris: 38′ Obrador (T), 39′ Esposito (C), 45 + 2′ Mina (C)
Casteddu (3-5-2): Caprile; Zappa, Mina, Dossena; Palestra, Adopo (72′ Sulemana), Gaetano, Deiola (72′ Folorunsho), Obert; Esposito (82′ Rodriguez), Mendy (82′ Belotti). A disp.: Ciocci, Sherri, Albarracìn, Borrelli, Kilicsoy. Allenatore: Pisacane.
Torino (3-4-1-2): Paleari; Marianucci (46′ Maripan), Coco, Ebosse; Pedersen (77′ Njie), Ilkhan (86′ Kulenovic), Prati (59′ Casadei), Obrador; Vlasic; Zapata (59′ Adams), Simeone. A disp.: Israel, Siviero, Nkounkou, Biraghi, Pellini, Lazaro, Savva, Acquah, Ilic, Perciun. Allenatore: D’Aversa.
